پارێزگهها دهۆكێ داوی پارێزگهها ههرێما كوردستانێیه، حالهتێن تووشبوون ب ڤایرۆسا كۆرۆنایێ هاتینه توماركرن، د نوكه ژی دا كێمترین حالهت ههنه، بهرپرسهكێ ساخلهمییا دهۆكێ ژی ددهت دیاركرن كو هیچ نهخۆشهكێ كۆرۆنایێ ل دهۆكێ پێدڤی ب چاڤدێرییا چر یان ئامیرێ ههناسهدانا دهستكرد نینه.
"وشه" دوماهی ئامار و پێزانینان ل سهر رهوشا كۆرۆنایێ ل پارێزگهها دهۆكێ بهلاڤ دكهت
حهمزه رهزیكی بهرپرسێ راگههاندنا رێڤهبهرییا گشتیی یا ساخلهمییا پارێزگهها دهۆكێ بۆ "وشه" گۆت، پارێزگهها دهۆكێ دوماهی پارێزگهها ههرێما كوردستانێ بوو حالهتێن تووشبوون ب كۆرۆنایێ تێدا هاتینه توماركرن و دوماهی جار ژی دوهی دوو حالهت هاتینه توماركرن.
زێدهتر گۆت "ل سنوورێ پارێزگهها دهۆكێ 33 كهس تووشی كۆرۆنایێ بوینه، ژ وان حالهتان 19 تووشبوو چاك بوینه و دووباره جارهكا دی ڤهگهریانه مال، د نوكه دا تنێ 14 كهس نوكه ل نهخۆشخانێن كۆرۆنایێ ل دهۆكێ چارهسهریا وان دهێتهكرن و ل بن چاڤدێرییا نوژداراندانه".
رهزیكی دیاركر ژی ههتا نوكه هیچ نهخۆشهكێ كۆرۆنایێ ل پارێزگهها دهۆكێ پێدڤی ب چاڤدێرییا چر و ئامیرێن ههناسهدانا دهستكرد نهبوینه و گۆت ژی، "ل پارێزگهها دهۆكێ دوو نهخۆشخانه تایبهت ب كۆرۆنایێ ههنه، نهخۆشخانا جوانكاری و سوتنێ كو هاتییه تایبهت كرن ب كۆرۆنایێ، نهخۆشخانا كاڤین كو ژلایێ كومپانیا كاڤین گرووپ هاتیه چێكرن، دیسان نهخۆشخانهكا دی ل ناوچهداریا فهیدیێ هاتییه چێكرن ئهو دبیته نهخۆشخانا سێ ل پارێزگهها دهۆكێ تایبهت ب كۆرۆنایێ بهلێ هێشتا نهكهفتییه كاری"
ل سنوورێ پارێزگهها دهۆكێ د نوكه دا 20 جهـ تایبهت ب كهرهنتین كرنا وان كهسان هاتینه دیاركرن ئهڤێن ژ دهرڤه زڤرین و گومان ههیه تووشی كۆرۆنایێ ببن یان ژی تێكهلییهكا ئێكسهر ل گهل تووشبوویێن كۆرۆنایێ كرییه، ئهڤرۆ 69 كهس هاتینه كهرهنتین كرن، دبهرامبهردا ههشت كهس ژ كهرهنیتنێ داوی هاتنه، ههردیسان ههتا نوكه چوار هزار و 866 كهس ژ كهرهنینێن پارێزگهها دهۆكێ دهركهفتنه، رهزیكی گۆت.
بهرپرسێ راگههاندنا ساخلهمیا پارێزگهها دهۆكێ دیاركر ژی كو ددهما 24 دهمژمێرێن بوری ل سنوورێ پارێزگهها دهۆكێ 370 پشكنین بۆ گومانلێكریێن كۆرۆنایێ هاتینهكرن، تنێ دوو كهس ههلگرێن ڤایرۆسا كۆرۆنایێ بوون و هاتنه توماركرن كو تووشی كۆرۆنایێ بوینه و گۆت ژی، "ههتا نوكه 17 هزار و 360 پشكنین ل سنوورێ پارێزگهها دهۆكێ بۆ گومانلێكریێن كۆرۆنایێ هاتینهكرن، ئهم دخوازین وهلاتی زێدهتر ل سهر رێنمایێن خوه پاراستنێ بكهن ب تایبهتی بكارئینانا دهمامك و دهستكێشا و خوه دویركرن ل جهێن قهرهبالغ و بهركهفتنا وهلاتییان، ههردیسان بهردهوام دهستێن خوه ب سابوون و پاقژكهرێن تایبهت ب شوون"
ل ههرێما كوردستانێ 710 كهس تووشی كۆرۆنایێ بوینه، ژ وانان حهفت كهسان گیانێ خوه ژ دهستدایه و 420 كهس ژی چاك بوینه، د نوكه دا 283 تووشبوویێن كۆرۆنایێ لژێر چاڤدێرییا نوژداریدانه.