سارا دوسكى، ئێكه ژ وان چالاكڤانێن ژن یێن خێرخوازه و ل سالا 2014ێ ههتا نوكه كهسوكار و مالا خوه ل وهلاتێ سوێدێ بجه هێلای و قهستا كوردستانێ كریه، ددهما بورى دا هاریكارى ل سهر پێشمهرگه و كهسوكارێن شههیدان و ئاواره و پهنابهران و خهلكێ ههژار و كێمدهرامهتێ كوردستانێ دابهش كریه، ئهوێ ل رۆژئاڤایێ كوردستانێ ژى رولهكێ بهرچاڤ د هاریكاریكرنێ دا ههبویه، ل داوى كار دا ل دهمێ دروستبوونا ئهرههژا باكورێ كوردستانێ دهركهفت و سهرۆكێ ههرێمێ دهمێ سهرهدانا باكورێ كوردستانێ كرى چاڤ ب سارایێ ژى كهفت..
سارا دوسكى، چالاكڤانا خێرخوازى دیاركر كو ئهوێ ل سالا 2014ێ قهستا ههرێما كوردستانێ كریه و دهست ب دابهشكرنا هاریكاریان بۆ پێشمهرگه و كهسوكارێن شههیدان و ئاواره و پهنابهر و خهلكێ ههژار و كێمدهرامهت كریه و بۆ "وشه" گۆت، پشتى ل سالا 2014ێ چهكدارێن تیرورستێن داعش سهرهلدایى و هێرش بو دهڤهرێن كوردستانیێن دهرڤهیێ ههرێما كوردستان و سنوورێ ههرێما كوردستانێ ئینایى و چهند دهڤهر داگیركرى و كارهسات و كومكوژیێن مرۆڤایهتى كرى ب تایبهتى ل دهڤهرا شنگالێ، ئهڤێ یهكێ گهلهك كارتێكرن ل من كر، ژبهرڤێ ل ناڤهراستا ههمان سال من مال و زاروك و خێزانا خوه ل وهلاتێ سوێدێ بجه هێلا و قهستا كوردستانێ كر ب مهرهما وێ یهكێ وهكو نوژدارهك ل نێزیك پشكدارێ د ئوپراسیوونێن پێشمهرگهى دا بكهم و برینێن پێشمهرگهیان ساخ بكهم، د گهرما شهرى دا من ژ نێزیك پێشمهرگه ل ههموو سهنگهرێن بهرهڤانیێ تیمار و چارهسهركرنه، من خزمهتا پێشمهرگهى ل ههموو سهنگهران كریه مینا شنگال، حهردان، كهسكێ، دهورۆبهرێن تهلهعفهر، گوندێن ئێزدیان، دیسان مێحوهرێ گوێر و مهخمور، زومار، ئهسكێ موسل، وانكێ و ههموو سهنگهرێن دى ژى خزمهتا پێشمهرگهى كریه، ههر بو نموونه ئهز شهش ههیڤان ل سهر ئێك ل چیایێ شنگالێ بووم و ههتاكو شنگال ئازاد كرى ل وێرێ بووم، پاشان ئهز ل گهل پێشمهرگهیان چومه كوبانێ و ههیڤهكێ ل وێرێ بووم، جارهكا دى ڤهگهریامه شنگالێ ب تایبهتى دناڤا كهمپێن شنگالێ و خزمهتكرنا وان كهسان یێن مال و حالێ خوه هێلاى و ل كهمپان دژیان.
دیسان من خزمهت بۆ پهنابهر و ئاوارهیان ژى كریه مینا كهمپا دهشتانێ، كهمپا نهورۆز، كهمپا باجد كهندالا، كهمپا ئێسیان، كهمپا كهبهرتو، كهمپا چهمشكو و ههموو كهمپێن دى ل پارێزگهها دهۆكێ، ل دهمێ هاریكاریكرنا پێشمهرگه و ئاواره و پهنابهران گهلهك نهخۆشى بۆ من درۆست بوینه ب تایبهتى ژ لایێ داعش، رۆژهكێ ئهز چووم دهرمانان بۆ پێشمهرگهى ببهم ل شنگالێ ، پاشان ب شهڤ زڤرین ڤه، ب رێڤه شوفێرێ من گوت دڤێت ئهز بزڤرم شنگالێ یا ژ منڤه برایێ وى شههید ببوو، ئهز دانام و ئهو زڤرى، ئهز تنێ مامه وێرێ، پاشان ئهز ل گهل ترومبێلهكێ سیاربووم و ل وێرێ رزگاربووم، دیسان ل مێحوهرێ حهردان ئهز توشى گولهبارانێن داعشێ بویمه، بهلێ سوپاس بۆ خودێ رزگاربووم، ههردیسان پشتى كو سوپایێ توركیا هێرشى عفرینێ كرى، من خواست بچم عفرینێ بهلێ رێك نهبوو لهوا نهچاربووم ب قاچاخى بچم و من هاریكارى گههاندن خهلكێ پێدڤى و بۆ دهما 15 رۆژان مامه ل عفرینێ، لدهڤ من تنێ خزمهتكرنا خهلكێ ههژار و كورد گرنگه و ههموو دهڤهر و پارچێن كوردستانێ ب كوردستان دبینم.
زێدهتر گۆت، خهلكێ كوردستانێ ب گشتى و پارێزگهها دهۆكێ ب تایبهتى گهلهك رێزێ ل من دگرن، خهلكێ ههژار د خوازن كو هاریكارى ل سهر وان بهردهوام بن، ژبهركو ئهوان پێدڤى ب هاریكاریێن بهردوامن، نوكه پرانیا خهلكێ ههژارن و پێدڤى ب ههڤكاریان ههیه، داخوازێ ل ههموو بهرپرس و زهنگین و كهسانێن خودان داهات و سامان و خودان شیان دكهم كو پشكهك ژ داهات و سامانێ خوه ل سهر خهلكێ ههژار و كێمدهرامهت دابهش بكهن، ژبهركو رۆژهكێ ئهو ژى ههژاربوون و نوكه زهنگین بوینه، چاڤێ خهلكێ ههژار و كێمدهرامهت بهردهوام ل سهر پێشكێشكرنا هاریكاریانه، نوكه گهلهك ژ تاخێن دهۆكێ ب تایبهتى گژهبهرا و بهرشكێ پێدڤى ب ههڤكاریان ههیه.
سارا دڤان نهه سالاندا چهندین جاران ڤهگهریایه سوێد و چهند ههیڤان مایه و جارهكا دى ڤهگهریایه كوردستانێ و ل سهر خزمهتكرنا خهلكێ ههژار بهردهوام بویه، ل بارا ڤێ یهكێ ژى گۆت، ئارمانجا من یا سهرهكى نوكه بۆ سهرهدانا مال و سوێد ئهوه كو ئهز مژولێ درۆستكرنا رێكخراوهكێ ، ئارمانجا سهرهكى یا ئهوێ رێكخراوێ ژى خزمهتكرنا پێشمهرگه و كهسوكار و خێزانێن شههیدان و خهلكێ ههژار و كێمدهرامهتێ كوردستانێ یه، دێ هاریكاریان ل وهلاتێ سوێدێ و كهسانێن زهنگین وهرگرم و ل گهل هاریكاریێن خوه دابهش كهم، هاریكارى دێ جوراوجور بن ب تایبهتى ئهرزاق و جلوبهرگ و دهرمان، دیسان دخوازم روویهكێ فهرمى و بهردهوام ژى بدهم وان هاریكاریێن كو ئهز وهردگرم و دابهش دكهم.
چالاكڤانا خێرخوازى د درێژاهیا ئاخفتنێن خودا دیاركر ژى كو ئهو بۆ خوشیا دلێ خوه نههاتیمه كوردستانێ و گوت ژى، رهنگه بۆ من ل سوێد خوشتر و باشتر ژى بیت، بهلێ كوردستان ئاخا منه و وهلاتێ من و جهێ ژ دایكبوونا منه، لهوا دخوازم ژین و مرنا من ل كوردستانێ بیت، دهما ههژار و كهسهكێ دبینم دلێ من دسوژیت، ههر دهما بچمه سوێد و دهرڤه ژى بتنێ ئارمانج ئهوه سهرهدانا زاروكێن خوه بكهم ژبهركو هندهك جاران ب چهند ههیڤان نابینم، نوكه پشتى دروستبونا ئهردههژێ ل باكورێ كوردستانێ، ئهز ژ نێزیك چویمه جهێن ئهرههژێ و ل گهل تیمێن كوردستانێ كار بۆ رزگاركرنا قوربانیان و چارهسهركرنا برینداران دكهین، ئهڤه ئهركهكێ مرۆڤایهتى یه و سهرۆكێ ههرێمێ ژى دهمێ سهرهدانا باكورێ كوردستانێ كرى رولێ مه ب گرنگ دانا.
ژبلى سهنگهرێن پێشمهرگهى د شهرى بهرهنگاربوونا ل گهل چهكدارێن تیرورستێن داعش، ههڤدهم سارایێ ژ نێزیك سهرهدانا سهنگهرێن پێشمهرگهى د شهرى بهرهنگاربوونا ل گهل حهشدا شهعبى ژى كریه، دڤى واریدا گۆت، پشتى روودانێن 16ێ ئوكتوبهرا سالا 2017ێ و هاتنا حهشدا شهعبى بو دهڤهرێن كوردستانێ، ئهز ل گهل پێشمهرگهى بویمه و من خزمهتا وان كریه، ژبلى دهڤهرێن سنوورێ پارێزگهها دهۆكێ و ههولێرێ ب تایبهتى ل پردێ و سحێلا كو پێشمهرگهى قههرهمانێن مهزن توماركرن و رێ ل ههمبهرى هاتنا حهشد شهعبى بو كوردستانێ گرت، ههڤدهم من قهستا دهڤهرێن كهركوكێ ژى كریه و ل گهل خوه حهفت ترومبێلێن دوو تهنى یێن پرى هاریكارى برن و ل سهر پێشمهرگهى دابهشكرن، لهوا دبێژم پێشمهرگهى گهلهك ماندوبوون و زهحمهت بریه و یێ ژ نێزیك سهرهدانێ بۆ نهكهت، نوزانیت چهند ماندوودبن و گیانێ خوه دكهن قوربانى.
سارا ل سالا 1961 ل گرێ قهسروكێ ل گوندێ باجلورێ ژ دایكبویه و ل سالا 1988 چویه وهلاتێ سوێد و كچهك و سێ كور ههنه و گۆت ژى، باوهرم نهخوشى د درێژ نینه و ل نێزیك دێ گورانكارى ل كوردستانێ روودهن و رهوشت بهر ب باشترڤه چیت، تنێ گرنگه ئێكگرتن و ئێكرێزى دناڤ سهركردایهتى و لایهنێن سیاسى و خهلكێ مه دا ههبیت، ههموو پێكڤه كار بۆ پاراستنا كوردستان و هاریكاریا ههڤدوو دا بكهن، سهرۆك مهسعود بارزانى ئێكه ژ وان كهسانێن كو خهبات و قوربانیدانهكا زور بو پێشڤهبرنا كوردستانێ دكهت، لهوا گرنگه پارت و لایهنێن سیاسى ب رژدى ههموو پێكڤه خزمهتهكا بهرچاڤ بۆ دوزا كوردى بكهن.