تاڵه‌بانی‌ داتا و ئاماره‌ پێویسته‌كانی له‌باره‌ی داهات و خه‌‌رجییه‌‌كان برده‌ به‌غدا

:: PM:03:09:27/01/2021 ‌
قوباد تاڵه‌بانی جێگری سه‌رۆك وه‌زیرانی هه‌رێمی كوردستان و سه‌رۆكی شاندی‌ دانوستانكاری حكوومه‌تی هه‌رێمی‌ كوردستان، له‌گه‌ڵ جێگرانی سه‌رۆكی ئه‌نجوومه‌نی نوێنه‌ران حه‌سه‌ن ئه‌لكه‌عبی جێگری یه‌كه‌م و د. به‌شیر حه‌داد جێگری دووه‌م كۆبووه‌وه‌.

سه‌میر هه‌ورامی‌ گوته‌بێژی جێگری سه‌رۆك وه‌زیرانی‌ كوردستان، له‌ روونكردنه‌وه‌یه‌كدا ئاماژه‌ی‌ به‌وه‌ كردووه‌، له‌ كۆبوونه‌وه‌كه‌دا كه‌ سه‌رۆكانی هه‌ردوو فراكسیۆنی پارتی‌ و یه‌كێتی‌، د. ڤیان سه‌بری و ئاڵا تاڵه‌بانی ئاماده‌ی بوون، گفتوگۆ كرا له‌باره‌ی پێوه‌ندییه‌كانی نێوان هه‌ولێر و به‌غدا و پڕۆژه‌یاسای بودجه‌ی عێراق بۆ ساڵی ٢٠٢١.

حه‌سه‌ن ئه‌لكه‌عبی ستایشی سه‌ردانه‌كانی قوباد تاڵه‌بانی و شاندی دانوستانكاری كرد
وه‌ك سه‌میر هه‌ورامی‌ گوتوویه‌تی‌، حه‌سه‌ن ئه‌لكه‌عبی ستایشی سه‌ردانه‌كانی قوباد تاڵه‌بانی و شاندی دانوستانكاری كرد بۆ به‌غدا له‌پێناو نزیككردنه‌وه‌ی دید و تێڕوانینه‌كان.

هه‌روه‌ها گوتی‌، شاندی‌ حكوومه‌تی هه‌رێم بۆ به‌رچاوڕوونی زیاتری سه‌رۆكایه‌تی په‌رله‌مانی عێراق، سه‌رجه‌م داتا و ئاماره‌ پێویسته‌كانی له‌باره‌ی به‌شه‌ بودجه‌ و داهات و خه‌‌رجییه‌‌كانی هه‌رێم به‌ شێوه‌یه‌كی شه‌فاف خسته‌ڕوو.

ماوه‌ی‌ سێ‌ ڕۆژه‌ شاندی‌ هه‌رێمی‌ كوردستان له‌ به‌غدایه‌ به‌مه‌به‌ستی‌ گفتوگۆ بۆ ڕێككه‌وتن، له‌و ماوه‌یه‌شدا چه‌ندان كۆبوونه‌وه‌ ئه‌نجام دراون.



وشە - سه‌رخێڵ هاشم

ئه‌م بابه‌ته 1869 جار خوێنراوه‌ته‌وه‌‌