ئەندامێكی پەرلەمانی عێراق ئاماژە دەكات كە بڕیارەكانی مەسروور بارزانی، سەرۆكی حكوومەتی هەرێم بەتەواوەتی لە بەرژەوەندیی خەڵكی كوردستانن، پێشبینی كرد كە لە ئایندەیەكی نزیكدا تەواوی كێشەكان لە هەرێمی كوردستان چارەسەر ببن و هەنگاو بەرەو قۆناغێكی نوێ و دڵخۆشكەر بنرێت.
ئەمڕۆ پێنجشەم سەگڤان سندی، ئەندامی پەرلەمانی عێراق بە "وشە"ی راگەیاند، بڕیارەكانی مەسروور بارزانی، سەرۆكی حكوومەتی هەرێمی كوردستان هەموویان لە بەرژەوەندیی خەڵكی كوردستانن و سوود و قازانجێكی باش بە هاووڵاتی و مووچەخۆران دەگات، بەهیوام بە بەردەوام ئەو بڕیارە باش و سوودبەخشانە بدرێت.
روونی كردەوە، پێشبینی دەكەم لە ئایندەیەكی نزیك تەواوی كێشەكان لە كوردستان چارەسەر ببن و هەنگاو بەرەو قۆناغێكی نوێ و دڵخۆشكەر بنێین، پێوەندییەكانی بەغدا و هەولێر بەتەواوی ئاساییی ببنەوە و هەموو شتەكان بە دڵی خەڵكی كوردستان دەبێت.
"ئاشكرایە سەرۆكی حكوومەت هەمووكات لە خەمی خەڵكی كوردستاندا بووە و هیچ كات درێغی لە كار و هەوڵ و خزمەت نەكردووە، هەموو بەربەست و كۆسپەكانی بەردەم حكومڕانی و خزمەتی لە كوردستان تێكشكاندووە، بۆیە بێگومان تا هەرێمی كوردستان خاوەنی مەسروور بارزانی بێت مەترسی و هەڕەشەكان هیچ كاریگەرییەكیان نابێت و كوردستان بەهێزتر دەبێت"، سەگڤان سندی وای گوت.
شایەنی باسە دوێنێ سەرۆكی حكوومەتی هەرێم و كابینەی نۆ جارێكی تر سەلماندیان كە هەموو هەوڵ توانایەكیان بۆ خزمەتكردن و سووككردنی بارگرانی و دابینكردنی خۆشگوزەرانی بۆ هاووڵاتییان تەرخان كردووە، بەتایبەتی بۆ مووچەخۆران لە مامۆستا و فەرمانبەران، كە ئەوانیش جارێكی تر شاگەشكە بوون و خۆشحاڵیی خۆیان بە بوونی حكوومەتێكی پارێزەر بۆ مافەكانیان دووپات كردەوە.
سلێمانی/ ئاسان محەمەد