ده‌مه‌كێ زۆره ئاریشا راكرنا گلێشی ل زاخۆ هه‌یه و بوویه ئه‌گه‌ر كێشه بو وه‌لاتییان دروست بن، سه‌رۆكێ باژێرڤانییا زاخۆ دیاركر كو دده‌ما بوریدا چه‌ندان جاران وان كومپانیا راكرنا گلێشی سزادایه، به‌لێ ل سه‌ر خه‌مسارییا خوه به‌رده‌وامه.
بژار مونیر سه‌رۆكێ باژێرڤانییا زاخۆ دیاركر، ئاریشا راكرنا گلێشی ل سه‌نته‌رێ قه‌زا زاخۆ چاره‌سه‌ر نه‌بوویه و گۆت "رۆژ بۆ رۆژێ گازندێن وه‌لاتییان ل بارا نه‌راكرنا گلێشێ مالان ژلایێ كومپانیا گلێشی ل زاخۆ به‌رده‌وامه و وه‌لاتی گه‌له‌ك دلگران و نیگه‌رانن، ئه‌م وه‌ك باژێرڤانییا زاخۆ ب كارێ كومپانیێ رازی نینه و مه گازنده ل كارێ كومپانیێ هه‌یه و چه‌ندان جاران ژی مه ژلایێ خوڤه سزادایه، به‌لێ كومپانی یا به‌رده‌وامه ل سه‌ر خه‌مساریێن خوه"
باژێرڤانیا زاخۆ نه‌شێت گرێبه‌ستا كومپانیێ هه‌لوه‌شینیت
زێده‌تر گۆت "چه‌ندان جاران مه جهێن شوله‌ژێ ئاگه‌هداركرینه كو كومپانیا راكرنا گلێشی نه‌شێت ب ئه‌ركێ خوه رابیت و هه‌ردوو روژان جاره‌كێ گلێشێ مالێن وه‌لاتیاین ل زاخۆ راكه‌ت و ڤه‌گواهێزیت و بن ئاخكه‌ت و ئاگر ژی نه‌به‌ربیتێ، به‌لێ جهێ داخێیه پێگیری بڤێ یه‌كێ نه‌هاتییه‌كرن و جهێن شوله‌ژێ ل گه‌ل مه‌نه، ئه‌م بو خه‌لكێ خوه دیار دكه‌ین كو باژێرڤانییا زاخۆ ده‌سته‌لات لسه‌ر هه‌لوه‌شاندنا گرێبه‌ستێ ل گه‌ل كومپانیێ نینه، به‌لكو تنێ دشێن كومپانیێ سزا بده‌ین، دده‌ما بوری دا ب كوژمێ 600 ملیون دیناران مه كومپانی سزادایه، به‌لێ دیسان ژی خه‌مساری به‌رده‌وامن"
ناڤبری دیاركر ژی كو ئه‌و دێ ل سه‌ر دوڤچوون و چاره‌سه‌ركرنا ئاریشا گلێشی ل زاخۆ به‌رده‌وام بن و گۆت ژی "دنوكه دا چوو شاشی ژلایێ باژێرڤانییا زاخۆ نینه، پێدڤییه جهێن شوله‌ژێ چاره‌سه‌رییا ئاریشا گلێشی ل زاخۆ بكه‌ن"
پێشتر ژی وه‌زیرێ باژێرڤانی و گه‌شتوگۆزار ژ نێزیك هایدارێ ره‌وشا ئاریشا گلێشی ل زاخۆ بوویه، چه‌ندان جاران بزاڤا چاره‌سه‌ركرنێ كرییه، به‌لێ هه‌تا نوكه نه‌هاتییه چاره‌سه‌ركرن.